பேரணாம்பட்டு | ஜனவரி 10
மகாத்மா காந்தி தேசிய ஊரக வேலை உறுதி திட்டத்தின் (MGNREGA) பெயரை, அரசியல் காழ்ப்புணர்ச்சியுடன் “விக்சித் பாரத் தேசிய ஊரக வேலை வாய்ப்பு திட்டம் (VB GRAM G)” என மாற்றியுள்ளதாகக் கூறி, மத்திய பாஜக அரசை கண்டித்து, அகில இந்திய காங்கிரஸ் கமிட்டி அறிவித்துள்ள போராட்டத்தின் ஒரு பகுதியாக, வேலூர் மத்திய மாவட்ட காங்கிரஸ் கமிட்டி சார்பில் இன்று (சனிக்கிழமை) பத்திரிகையாளர்கள் சந்திப்பு நடைபெற்றது.
இந்த சந்திப்பு, வேலூர் மத்திய மாவட்ட காங்கிரஸ் கமிட்டி தலைவர் கு. சுரேஷ்குமார் தலைமையில் நடைபெற்றது. இதில் அவர் பேசுகையில்,
மகாத்மா காந்தி தேசிய ஊரக வேலை உறுதி திட்டம் என்பது கிராமப்புற ஏழை மக்களின் வாழ்வாதார உரிமையை உறுதி செய்த சமூக நீதி திட்டம் என்றும், அந்த திட்டத்தின் பெயரில் இருந்து மகாத்மா காந்தி என்ற பெயரை நீக்குவது அரசியல் நோக்கத்துடன் மேற்கொள்ளப்படும் நடவடிக்கை என்றும் குற்றம்சாட்டினார்.
மேலும் அவர் கூறுகையில்,
“MGNREGA என்பது வெறும் ஒரு வேலைவாய்ப்பு திட்டம் அல்ல. அது கிராமப்புற மக்களின் வாழ்க்கை பாதுகாப்பு கவசம். கோடிக்கணக்கான விவசாய தொழிலாளர்கள், பெண்கள் மற்றும் ஆதரவற்ற மக்களுக்கு நம்பிக்கையாக விளங்கும் திட்டத்தின் பெயரை மாற்றுவது, அந்த திட்டத்தின் அடிப்படை தத்துவத்தையே மாற்றும் முயற்சியாகும்” என தெரிவித்தார்.
இந்த பெயர் மாற்றம் மூலம்,
➡️ மகாத்மா காந்தியின் சமூக நீதி சிந்தனையை மறைக்கவும்,
➡️ காங்கிரஸ் ஆட்சியில் உருவான மக்கள் நலத் திட்டங்களின் அடையாளங்களை அழிக்கவும்,
➡️ திட்டத்தின் சட்டபூர்வ தன்மையை மெல்ல சிதைக்கும் நோக்கமும் இருக்கலாம்
என்ற சந்தேகத்தை அவர் வெளிப்படுத்தினார்.
இந்த பத்திரிகையாளர்கள் சந்திப்பில்,
வேலூர் மாவட்ட ஊராட்சி குழு துணைத் தலைவர் கிருஷ்ணவேணி ஜலந்தர்,
மாவட்ட துணைத் தலைவர் திருமதி தேவகிராணி ராஜேந்திரன்,
மாவட்ட பொதுச் செயலாளர் இர்ஷாத் அஹமத் உள்ளிட்ட காங்கிரஸ் கட்சி நிர்வாகிகள் கலந்து கொண்டு தங்களின் கருத்துகளை பதிவு செய்தனர்.
அவர்கள் பேசுகையில்,
MGNREGA திட்டம் 2005 ஆம் ஆண்டு நாடாளுமன்ற சட்டத்தின் மூலம் உருவாக்கப்பட்ட திட்டம் என்பதையும்,
அதன் பெயரை மாற்றுவது சட்ட ரீதியாகவும், அரசியல் ரீதியாகவும் கேள்விக்குறியாகும் என்றும் தெரிவித்தனர்.
மேலும், இந்த திட்டம் கிராமப்புற வேலைவாய்ப்பு, ஊரக உட்கட்டமைப்பு, பெண்கள் பொருளாதார சுயநிலையை உறுதி செய்வதில் முக்கிய பங்காற்றி வருவதாகவும் அவர்கள் சுட்டிக்காட்டினர்.
இந்த விவகாரத்தில்,
மத்திய அரசின் முடிவை திரும்பப் பெற வேண்டும்,
MGNREGA என்ற பெயரும் அதன் அடையாளமும் பாதுகாக்கப்பட வேண்டும்,
என்று வலியுறுத்தி, அகில இந்திய காங்கிரஸ் கமிட்டி அறிவித்துள்ள நாடு தழுவிய போராட்டங்களில் வேலூர் மத்திய மாவட்ட காங்கிரஸ் கமிட்டியும் முழு ஈடுபாட்டுடன் பங்கேற்கும் என அறிவிக்கப்பட்டது.
குடியாத்தம் தாலுகா செய்தியாளர் : கே.வி. ராஜேந்திரன்
