சின்னமனூர், டிசம்பர் 21:
தேனி மாவட்டம் சின்னமனூர் நகராட்சிக்கு உட்பட்ட மின் மயானத்தில், அடக்கம் செய்யப்பட்ட மூதாட்டியின் உடல் தொடர்பாக ஏற்பட்டதாகக் கூறப்படும் சம்பவம் அப்பகுதியில் பரபரப்பை ஏற்படுத்தியுள்ளது. இதுதொடர்பாக, மூதாட்டியின் உறவினர்கள் காவல் நிலையத்தில் புகார் அளித்துள்ளனர்.
சம்பவ விவரம்:
சின்னமனூர் நகராட்சிக்குட்பட்ட தலையாரி ராமசாமி தெருவைச் சேர்ந்த சின்னத்தம்பியா பிள்ளை அவர்களின் மனைவி சினியம்மாள் (வயது 98) கடந்த 19.12.2025 அன்று வயது மூப்பின் காரணமாக காலமானார்.
இதையடுத்து, 20.12.2025 அன்று மாலை 3.30 மணி அளவில், அவரது உடல் சின்னமனூர் நகராட்சி மின் மயானத்தில் முறையாக தகனம் செய்யப்பட்டது. இறுதிச் சடங்குகள் முடிந்த பின் உறவினர்கள் அனைவரும் அங்கிருந்து புறப்பட்டனர்.
புகாரின் உள்ளடக்கம்:
அதே நாளில் மாலை 6.00 மணி அளவில், மற்றொரு இறப்புக்கான தகனம் மேற்கொள்ளப்பட்ட போது, ஏற்கனவே தகனம் செய்யப்பட்டிருந்த சினியம்மாளின் உடல் முழுமையாக எரியூட்டப்படுவதற்கு முன்பே மாற்றப்பட்டதாக உறவினர்கள் தரப்பில் புகார் அளிக்கப்பட்டுள்ளது.
இந்த தகவலை அறிந்த உறவினர்கள் மற்றும் பொதுமக்கள் மின் மயானத்திற்கு வந்து விளக்கம் கேட்ட போது, பணியில் இருந்த ஊழியர்களிடமிருந்து தெளிவான பதில் கிடைக்கவில்லை என தெரிவிக்கப்பட்டுள்ளது. இதனால் அங்கு வாக்குவாதம் ஏற்பட்டதாக கூறப்படுகிறது.
காவல் நிலையத்தில் மனு:
இறுதி மரியாதை தொடர்பாக முறைகேடு நடந்துள்ளதாகக் கூறி, சம்பந்தப்பட்ட மின் மயான ஊழியர்கள் மீது நடவடிக்கை எடுக்கக் கோரி, சின்னமனூர் காவல் நிலையத்தில் மூதாட்டியின் உறவினர்கள் புகார் மனு அளித்துள்ளனர்.
நகரமன்றத் தலைவர் விளக்கம்:
இச்சம்பவம் தொடர்பாக சின்னமனூர் நகரமன்றத் தலைவர் திருமதி. அய்யம்மாள் ராமு வெளியிட்டுள்ள அதிகாரப்பூர்வ அறிவிப்பில்,
20.12.2025 அன்று நவீன எரிவாயு தகன மேடையில் இயந்திரக் கோளாறு ஏற்பட்டதாகவும், இதனால் சடலங்கள் சரிவர எரியூட்டப்படவில்லை என்ற புகார் வந்துள்ளதாகவும் தெரிவித்துள்ளார்.
இயந்திரக் கோளாறு காரணமாக பராமரிப்புப் பணிகள் மேற்கொள்ளப்பட உள்ளன.
20.12.2025 முதல் 31.12.2025 வரை நவீன எரிவாயு தகன மேடை தற்காலிகமாக நிறுத்தி வைக்கப்பட்டுள்ளது.
பராமரிப்பு காலத்தில், மாற்று ஏற்பாடாக நத்தம் மேடு – முல்லைப் பெரியாற்றுப் படுகை பகுதியில் தகனம் செய்யலாம் என அறிவிக்கப்பட்டுள்ளது.
பராமரிப்புப் பணிகள் முடிந்த பின், ஏழை எளிய மக்களின் தகனச் செலவுகளை தன் சொந்தச் செலவில் ஏற்றுக்கொள்வதாகவும் அவர் உறுதி அளித்துள்ளார்.
விசாரணை:
இந்த சம்பவம் குறித்து நகராட்சி நிர்வாகமும், காவல்துறையும் தனித்தனியாக விசாரணை மேற்கொண்டு வருகின்றன.
நமது நிருபர்.
