கள்ளக்குறிச்சி அரசு ஆண்கள் மேல்நிலைப் பள்ளியில், இந்தியன் ரெட் கிராஸ் சொசைட்டி சார்பில் (03.02.2026) போதைப் பொருள் பழக்கத்திற்கு எதிர்ப்பு மற்றும் தற்கொலை தடுப்பு குறித்த விழிப்புணர்வு கருத்தரங்கம் நடைபெற்றது. மாணவர்களிடையே சமூக பொறுப்புணர்வையும் மனநல விழிப்புணர்வையும் வளர்க்கும் நோக்கில் இந்த நிகழ்ச்சி ஏற்பாடு செய்யப்பட்டது.
தலைமை ஆசிரியர் தலைமையில் நிகழ்ச்சி.
நிகழ்ச்சிக்கு அரசு ஆண்கள் மேல்நிலைப் பள்ளி தலைமை ஆசிரியர் கலாபவன் தலைமை தாங்கினார்.
இந்தியன் ரெட் கிராஸ் சொசைட்டி மாவட்ட செயலாளர் இம்மானுவேல், மாவட்ட பொருளாளர் சுரேஷ்குமார், உதவி தலைமை ஆசிரியர் தமிழ்ச்செல்வன் ஆகியோர் முன்னிலை வகித்தனர்.
போதைப் பொருள் தீமைகள் குறித்து விழிப்புணர்வு.
மாவட்ட சேர்மன் டாக்டர் பொன்னரசு கலந்து கொண்டு சிறப்புரையாற்றினார். அவர் பேசுகையில், போதைப் பொருட்களை பயன்படுத்துவதால் ஏற்படும் உடல், மன, சமூக பாதிப்புகள் குறித்து விரிவாக எடுத்துரைத்தார். இளைய தலைமுறையினர் தவறான பழக்கங்களுக்கு அடிமையாவதைத் தடுக்கும் வழிமுறைகள் குறித்தும் மாணவர்களுக்கு விளக்கினார்.
தற்கொலை எண்ணங்களைத் தவிர்க்கும் வழிகள்.
மேலும், மாணவர்களுக்கு தற்கொலை எண்ணம் ஏற்படுவதற்கான காரணங்கள், மன அழுத்தத்தை எதிர்கொள்வது, உதவி நாட வேண்டிய தருணங்கள் மற்றும் தற்கொலை தடுப்பு வழிமுறைகள் குறித்து விழிப்புணர்வு ஏற்படுத்தினார். வாழ்க்கையை நேசித்து சவால்களை தைரியமாக எதிர்கொள்ள வேண்டும் என்றும் அவர் வலியுறுத்தினார்.
500-க்கும் மேற்பட்டோர் பங்கேற்பு.
இந்த நிகழ்ச்சியில் பள்ளி ஆசிரியர்கள், போதைப்பொருள் எதிர்ப்பு குழு உறுப்பினர்கள், ஜூனியர் ரெட் கிராஸ் மாணவர்கள் உள்ளிட்ட 500-க்கும் மேற்பட்டோர் கலந்து கொண்டு பயனடைந்தனர்.
செய்தி : கள்ளக்குறிச்சி மாவட்டம்
V. ஜெய்சங்கர்
தமிழ்நாடு டுடே
மக்கள் தொடர்பு அதிகாரி.
