சென்னை மாவட்ட செய்திகள் – 28.11.2025
பெரம்பூரில் ரியல் எஸ்டேட் அலுவலகம் பெயரில் பெண்களை வைத்து பாலியல் தொழில் நடத்தி வந்த நபர் கைது — 2 பெண்கள் மீட்பு.
சென்னை:
சென்னை பெருநகர காவல்துறையின் விபச்சார தடுப்புப் பிரிவு–2 போலீஸ் குழுவினருக்கு கிடைத்த ரகசிய தகவலின் பேரில், பெரம்பூர் பகுதியில் நடத்தப்பட்ட திடீர் சோதனையில் பெண்களை வைத்து பாலியல் தொழில் நடத்திய சம்பவம் உறுதி செய்யப்பட்டது.
காவல்துறை தகவலின் படி, பெரம்பூர் மேல்பட்டி பொன்னப்பன் தெருவில் உள்ள வணிக வளாகத்தில் ரியல் எஸ்டேட் அலுவலகம் என்ற பெயரில் இயங்கி வந்த ஒரு அலுவலகத்தில் சந்தேகத்திற்கிடமான அசைவுகள் இருப்பதாக தகவல் கிடைத்தது. இதையடுத்து, போலீசார் அந்த இடத்தை கண்காணிப்பு செய்து, பெண்கள் பாலியல் தொழிலுக்கு பயன்படுத்தப்படுவது உறுதி செய்யப்பட்டது.
பின்னர், பெண் காவலர்கள் உட்பட சிறப்பு குழு அங்கு திடீர் சோதனை நடத்தியதில், தி.நகரை சேர்ந்த சரவணன் செல்வன் (வயது 57) பெண்களை வைத்து பாலியல் தொழில் நடத்தி வந்தது தெரியவந்தது. உடனடியாக அவர் கைது செய்யப்பட்டார்.
சோதனையில்:
1 செல்போன் போலீசார் பறிமுதல் செய்தனர்
பாலியல் தொழிலில் ஈடுபடுத்தப்பட்ட நிலையில் இருந்த 2 பெண்கள் மீட்கப்பட்டனர்
விசாரணையில், சரவணன் செல்வன் மேற்படி வணிக வளாகத்தில் ஒரு அறையை வாடகைக்கு எடுத்து, ரியல் எஸ்டேட் அலுவலகம் என்ற பெயரில் மறைவாக பாலியல் தொழில் நடத்தி வந்ததும், அவருக்கு இதே குற்றச்சாட்டில் முன்பும் ஒரு வழக்கு இருந்ததும் தெரிந்தது.
கைது செய்யப்பட்ட சரவணன் செல்வன் நேற்று நீதிமன்றத்தில் ஆஜர் செய்யப்பட்டு, நீதிமன்ற உத்தரவின் பேரில் சிறையில் அடைக்கப்பட்டார்.
மீட்கப்பட்ட இரு பெண்கள் அரசு மகளிர் காப்பகத்தில் ஒப்படைக்கப்பட்டனர்.
செய்தி: தமிழ்நாடு டுடே – சென்னை மாவட்ட செய்தியாளர்
எம். யாசர் அலி
