தமிழ்நாடு சட்டமன்றத் தேர்தல் 2026 நடைபெற்று வரும் நிலையில், திருவண்ணாமலை மாவட்டம் கலசப்பாக்கம் தொகுதிக்குட்பட்ட கீழ்பாலூர் (193வது) வாக்குச்சாவடியில் அதிர்ச்சிகரமான சம்பவம் ஒன்று நிகழ்ந்துள்ளது.
வாக்குப்பதிவு விறுவிறுப்பாக நடைபெற்று கொண்டிருந்த வேளையில், சுயேட்சை வேட்பாளரின் பூத் ஏஜெண்ட் ஒருவர் திடீரென வாக்குப்பதிவு இயந்திரத்தை (EVM) சேதப்படுத்தியதாக கூறப்படுகிறது. இந்த சம்பவத்தால் வாக்குச்சாவடியில் பெரும் பரபரப்பு ஏற்பட்டது.
சேதப்படுத்தப்பட்ட அந்த EVM-இல் ஏற்கனவே 208 வாக்குகள் பதிவு செய்யப்பட்டிருந்தது குறிப்பிடத்தக்கது. உடனடியாக சம்பவ இடத்திற்கு சென்ற போலீசார், குறித்த நபரை கைது செய்து விசாரணைக்காக அழைத்துச் சென்றனர்.
இதன் காரணமாக அந்த வாக்குச்சாவடியில் வாக்குப்பதிவு தற்காலிகமாக பாதிக்கப்பட்டது. சம்பவத்தின் தீவிரத்தை கருத்தில் கொண்டு, மாவட்ட தேர்தல் அலுவலர் மற்றும் கண்காணிப்பாளர் உள்ளிட்ட அதிகாரிகள் நேரில் வந்து ஆய்வு மேற்கொண்டு வருகின்றனர்.
இந்த நிலையில், பாதிக்கப்பட்ட வாக்குச்சாவடியில் மறுவாக்குப்பதிவு நடத்தப்படுமா? என்ற கேள்வி எழுந்துள்ளது. தேர்தல் ஆணையத்தின் வழிகாட்டுதலின்படி அதிகாரப்பூர்வ முடிவு எடுக்கப்படும் என எதிர்பார்க்கப்படுகிறது.
தொகுதி பின்னணி:
கலசப்பாக்கம் தொகுதியில் 2021-ஆம் ஆண்டு திமுக சார்பில் சரவணன் வெற்றி பெற்றார். இந்த முறைவும் அவர் மீண்டும் போட்டியிடுகிறார். அதிமுக சார்பில் முன்னாள் அமைச்சர் அக்ரி எஸ். கிருஷ்ணமூர்த்தி, தவெக சார்பில் ஏழுமலை, நாம் தமிழர் கட்சி சார்பில் கீதா உள்ளிட்டோர் களத்தில் உள்ளனர்.
மாநில நிலவரம்:
தமிழ்நாடு முழுவதும் 234 தொகுதிகளிலும் வாக்குப்பதிவு உற்சாகமாக நடைபெற்று வருகிறது. காலை 11 மணி நிலவரப்படி சுமார் 37.57% வாக்குகள் பதிவு செய்யப்பட்டுள்ளன. கடந்த 2021 தேர்தலை ஒப்பிடுகையில் இது குறிப்பிடத்தக்க அளவு உயர்வாகும்.
இந்த EVM சேதப்படுத்தல் சம்பவம், தேர்தல் சூழலில் பெரும் கவனத்தை ஈர்த்துள்ளது.
ஷேக் முகைதீன்- இணை ஆசிரியர்
