3 கார்கள், 3 ஆட்டோக்கள், 1 பேருந்து உள்ளிட்ட பல வாகனங்கள் சேதம்.
சென்னை மாவட்டம் | 09.12.2025
செய்தியாளர்: எம். யாசர் அலி
கொளத்தூர் பெரியார் நகர், ஜெகநாதன் சாலை பகுதியில் நேற்று (டிசம்பர் 8) நள்ளிரவு 12 மணியளவில் குடிபோதையில் இருந்த இரண்டு நபர்கள், சாலையில் நிறுத்தி வைக்கப்பட்டிருந்த வாகனங்களை கற்களால் அடித்து உடைத்த சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது.
இந்த வெறிச்செயலில்:
தனியார் கல்லூரிக்கு சொந்தமான ஒரு பேருந்து,
ஜோஸ்வா டேனியல் என்பவருக்கு சொந்தமான ஒரு கார்,
அருண் சாமுவேல் என்பவருக்கு சொந்தமான ஒரு கார்,
மேலும் மூன்று ஆட்டோக்கள்,சாலையோரம் நிறுத்தி வைக்கப்பட்டிருந்த பல இருசக்கர வாகனங்கள் என மொத்தமாக பல லட்சம் ரூபாய் மதிப்பிலான சேதம் ஏற்பட்டுள்ளதாக கூறப்படுகிறது.
🕓 அதிகாலை வெளிச்சத்திற்கு வந்த அட்டகாசம்.
இவ்விபத்து இன்று அதிகாலை 4 மணியளவில் அப்பகுதியைச் சேர்ந்த பொதுமக்கள் வெளியே வந்து பார்த்தபோது தான் தெரிய வந்துள்ளது. உடனடியாக அவர்கள் இது குறித்து கொளத்தூர் காவல் நிலையத்திற்கு தகவல் தெரிவித்தனர்.
🎥 சிசிடிவி காட்சிகள் ஆய்வு – இருவரை தேடி போலீசார் வலை.
தகவலின் பேரில் சம்பவ இடத்துக்குச் சென்ற சென்னை காவல் துறை,
அப்பகுதியில் உள்ள சிசிடிவி கேமரா பதிவுகளை தீவிரமாக ஆய்வு செய்து,
குடிபோதையில் வாகனங்களை அடித்து உடைத்த நபர்களை அடையாளம் காணும் பணியில் தீவிரமாக ஈடுபட்டு வருகின்றனர்.
⚠️ பொதுமக்கள் அச்சம் – பாதுகாப்பு கேள்விக்குறி
நள்ளிரவில் நிகழ்ந்த இந்த சம்பவம் அப்பகுதி மக்களிடையே பெரும் அச்சத்தையும், பாதுகாப்பு குறித்த கேள்விகளையும் எழுப்பியுள்ளது.
“நள்ளிரவில் இப்படியான சம்பவங்கள் தொடர்ந்து நடக்கத் தொடங்கினால் பொதுமக்கள் எப்படி பாதுகாப்பாக வாழ முடியும்?” என அவர்கள் வேதனையுடன் கேள்வி எழுப்பியுள்ளனர்.
