திண்டுக்கல், மே 21: மாவட்டத்தில் இயக்கப்படும் தனியார் பள்ளி வாகனங்களின் பாதுகாப்பு உறுதிகளை ஆய்வு செய்யும் பணியில் மாவட்ட ஆட்சியர் சரவணன் நேரடியாக ஈடுபட்டார். திண்டுக்கல் வட்டார போக்குவரத்து அலுவலக மைதானத்தில், தனியார் பள்ளிகளைச் சேர்ந்த பேருந்துகள் மற்றும் வேன்களைக் கொண்டு வரச்செய்து, அவற்றை ஒவ்வொன்றாகப் பார்வையிட்டு ஆய்வு மேற்கொண்டார்.
முக்கிய பாதுகாப்பு அம்சங்கள் ஆய்வு:
மாவட்ட ஆட்சியர் தலைமையிலான குழு, பள்ளி வாகனங்களில் பின்வரும் வசதிகள் முறையாக உள்ளனவா என ஆய்வு செய்தது:
· வேகக் கட்டுப்பாடு (Speed Governor): அனைத்து வாகனங்களிலும் வேகக் கட்டுப்பாட்டுக் கருவிகள் பொருத்தப்பட்டுள்ளதா என சரிபார்க்கப்பட்டது.
· அவசரகால வழிகள் (Emergency Exits): மாணவர்கள் அவசர காலத்தில் வெளியேறுவதற்கான வசதிகள் இருப்பது உறுதி செய்யப்பட்டது.
· தீயணைப்பு கருவிகள் (Fire Extinguisher): ஒவ்வொரு வாகனத்திலும் தீயணைப்பு சிலிண்டர் இருப்பதை நேரில் பார்வையிட்டு உறுதி செய்தார்.
· முதலுதவி பெட்டிகள் (First Aid Kits): காயங்கள் அல்லது உடல்நலக் குறைவு ஏற்பட்டால் பயன்படுத்துவதற்கான முதலுதவிப் பொருட்கள் வைத்திருப்பது கட்டாயமாக்கப்பட்டுள்ளது.
· சிசிடிவி கேமராக்கள் (CCTV Cameras): மாணவர்களின் பாதுகாப்பிற்காக வாகனத்தின் உட்புறம் மற்றும் வெளிப்புறத்தில் கண்காணிப்பு கேமராக்கள் பொருத்தப்பட்டுள்ளதா என ஆய்வு செய்யப்பட்டது.
· படிக்கட்டுகள் (Steps): மாணவர்கள் ஏறி இறங்கும் படிக்கட்டுகள் பாதுகாப்பான முறையில் அமைக்கப்பட்டுள்ளதா என பார்க்கப்பட்டது.
தீயணைப்பு வீரர்களின் செயல் விளக்கம்:
தீ விபத்து போன்ற அவசர சூழல்களில் எவ்வாறு செயல்படுவது என்பது குறித்து, தீயணைப்பு மற்றும் மீட்புத் துறை வீரர்கள் வாகன ஓட்டுநர்கள் மற்றும் உதவியாளர்களுக்கு நேரிடையாக செயல் விளக்கம் அளித்தனர். தீயணைப்பு சிலிண்டரை எவ்வாறு இயக்குவது, தீப்பற்றும் போது மாணவர்களை வெளியேற்றும் முறைகள் உள்ளிட்ட பயிற்சி வழங்கப்பட்டது.
இந்த ஆய்வின் மூலம், பள்ளி வாகனங்கள் அனைத்தும் முழுமையான பாதுகாப்புத் தரங்களைப் பின்பற்றுவதை உறுதி செய்ய வேண்டும் என மாவட்ட ஆட்சியர் சரவணன் தெரிவித்தார். விதிமீறல்கள் கண்டறியப்பட்ட வாகனங்கள் மீது உரிய நடவடிக்கை எடுக்கப்படும் எனவும் எச்சரித்தார்.
செய்தியாளர்: நத்தம் ஏ. தினேஷ், திண்டுக்கல் மாவட்ட செய்தியாளர்.
