அடித்து ஆடும் அன்புமணி! அடுத்து என்ன செய்யப் போகிறார் ராமதாஸ்?
பாமக அரசியல் இன்று ஒரு தந்தை – மகன் போராட்டத்தின் மேடையாக மாறி விட்டது. தினமும் தலைப்பு செய்திகளில் இடம் பெறும் அளவுக்கு, பாமக உச்சக்கட்டத்தில் இருக்கிறது.
அன்புமணியின் புது அதிரடி:
கட்சியின் சட்டப்பேரவை குழுத் தலைவராக இருந்த ஜி.கே.மணியை நீக்கி, வெங்கடேஸ்வரனை நியமித்திருப்பது, அன்புமணியின் அரசியல் பந்தயம் எவ்வளவு கடுமையாக இருக்கிறது என்பதை காட்டுகிறது.
கட்சிக்கு பல தசாப்தங்கள் அர்ப்பணித்த தலைவரை கூட விலக்கி விடும் துணிச்சலை எடுத்திருக்கிறார். இதேசமயம், எம்எல்ஏ அருளையும் நீக்கப்போவதாக அறிவித்து, பாமக சட்டப்பேரவைக் குழுவின் கட்டுப்பாட்டை தன் கையில் இறுக்கமாகப் பிடித்துள்ளார்.
அன்புமணியின் கணக்குப்படி, 5 எம்எல்ஏகளில் 3 பேர் தன்னுடன் இருக்கிறார்கள். அவர்களைத் தலைமை, துணைத் தலைவர், கொறடா பதவிகளில் அமர்த்தி, “சட்டப்பேரவையில் பாமகவின் உண்மையான உரிமையாளர் நானே” என்று சபாநாயகரைச் சவால் விடும் நிலைக்கு வந்துள்ளார்.
ராமதாஸின் எதிர் தாக்குதல்:
ஆனால் தந்தை ராமதாஸ் மவுனமாக உட்காரவில்லை. “நான் தான் பாமக நிறுவனர்; எனவே கட்சி சின்னமும் பெயரும் எனக்கே சொந்தம்” என தேர்தல் ஆணையத்தின் கதவைத் தட்டியுள்ளார்.
மேலும், தனது பழைய அரசியல் அடையாளமான வன்னியர் சங்கத்தை மீண்டும் கையில் எடுத்து, மக்கள் ஆதரவை குவிக்கத் தொடங்கியுள்ளார். டிசம்பர் மாதத்தில் பிரமாண்டமாக வன்னியர் இடஒதுக்கீடு போராட்டம் நடத்துவதாக அறிவித்திருப்பது, தந்தையின் பிளான் எவ்வளவு பெரியது என்பதை உணர்த்துகிறது.
சின்னம் யாருக்கு?
இந்தக் கேள்விதான் இப்போது தமிழக அரசியலில் அதிகம் பேசப்படுகிறது.
அன்புமணி பக்கம் எம்எல்ஏக்கள், நிர்வாகிகள், டெல்லி லாபி என பல வலுவான ஆதரவுகள் உள்ளன.
ராமதாஸ் பக்கம் நிறுவனர் என்ற அடையாளம், வன்னியர் சமூகத்தில் இருக்கும் தாக்கம், நீண்டகால அனுபவம் ஆகியவை பலம்.
இங்கே சரத்பவார் – அஜித் பவார் எடுத்துக்காட்டு முக்கியம். நிறுவனர் இருந்தாலும், பெரும்பான்மை எம்.எல்.ஏ, எம்.பிக்கள் அஜித் பவாருடன் சென்றதால் கட்சியும் சின்னமும் அவருக்கே போய் சேர்ந்தது. இதே நிலை பாமகவிலும் நிகழ வாய்ப்பு அதிகம்.
எதிர்காலப் பிம்பம்:
அன்புமணி அதிமுக–பாஜக கூட்டணியோடு இணைவது உறுதியானது.
ராமதாஸ், திமுக அல்லது எதிரணி அணியோடு இணைவார்.
இருவரும் ஒரே அணியில் சேர்வது கிட்டத்தட்ட சாத்தியமற்றது.
அப்படியானால், வட மாவட்டங்களில் பாமக பிளவு நேரடியாக தேர்தல் சூழலை கொதிக்க வைக்கும். வன்னியர் ஆதரவை பிளக்கும் இந்த மோதல், 2026 தேர்தலில் பெரிய தாக்கத்தை ஏற்படுத்தும்.
இறுதியாக:
இன்று பாமக அரசியல் ஒரு சதுரங்க ஆட்டம் போல இருக்கிறது.
அன்புமணி கையில் டெல்லி ஆதரவு + சட்ட ரீதியான ஆட்டங்கள்.
ராமதாஸ் கையில் அடையாள அரசியல் + தெரு போராட்டங்கள்.
இருவரும் “ஒரு கை பார்த்துவிடுவேன்” என்ற சவாலோடு களத்தில் இறங்கி விட்டனர்.
அடுத்த கேள்வி:
பாமகவின் எதிர்காலத்தில் யாரின் கை மேலோங்கப் போகிறது? தந்தையா? மகனா? தீர்மானிக்கிறது காலத்தின் கோலம்…?
சேக் முகைதீன்
இணை ஆசிரியர் (சமூக ஊடகங்கள்)
