தூத்துக்குடி, மார்ச் 19, 2026.
தூத்துக்குடி மாவட்டம் விளாத்திகுளம் அருகே உள்ள வேடநத்தம் கிராமத்தைச் சேர்ந்த 12-ஆம் வகுப்பு மாணவி கொல்லப்பட்ட அதிர்ச்சிகரமான வழக்கில் இன்று முக்கியமான முன்னேற்றம் ஏற்பட்டுள்ளது. இந்த வழக்கில் முக்கிய குற்றவாளி கைது செய்யப்பட்டுள்ளதுடன், நீதிமன்றமும் நேரடியாக தலையீடு செய்து விசாரணையை கண்காணித்து வருகிறது.
முக்கிய குற்றவாளி கைது – டிஎன்ஏ ஆதாரம் உறுதி
இந்த கொலை வழக்கில் ராமநாதபுரம் மாவட்டம் சாயல்குடியைச் சேர்ந்த தர்ம முனீஸ்வரன் (38) என்பவரை போலீஸார் கைது செய்துள்ளனர். மாணவியின் நகங்களில் இருந்து பெறப்பட்ட டிஎன்ஏ மாதிரி மற்றும் கைதான குற்றவாளியின் டிஎன்ஏ மாதிரி ஒத்துப்போனது விசாரணையில் உறுதி செய்யப்பட்டுள்ளதாக தகவல்கள் தெரிவிக்கின்றன. இது வழக்கில் மிக முக்கியமான தடய அறிவியல் ஆதாரமாக கருதப்படுகிறது.
மேலும், தர்ம முனீஸ்வரன் ஏற்கனவே 2020ஆம் ஆண்டு எட்டயபுரத்தில் மூதாட்டி ஒருவரை பாலியல் வன்கொடுமை செய்த வழக்கில் தொடர்புடையவர் என்றும், அப்போது கைது செய்யப்பட்ட அவர் தற்போது ஜாமீனில் வெளியே இருந்ததும் விசாரணையில் தெரியவந்துள்ளது.
சிசிடிவி காட்சிகள் வழியாக சிக்கிய குற்றவாளி
சம்பவம் நடந்த இடத்திற்கு அருகில் அடையாளம் தெரியாத இருசக்கர வாகனம் ஒன்று சந்தேகத்திற்கிடமாக நிறுத்தப்பட்டிருந்தது. இதையடுத்து, அப்பகுதியில் உள்ள காற்றாலை வளாகங்களில் பொருத்தப்பட்டிருந்த சிசிடிவி கேமரா காட்சிகளை போலீஸார் ஆய்வு செய்தனர்.
அதில், சம்பவ நேரத்தில் முனீஸ்வரன் அந்தப் பகுதியில் நடமாடியது உறுதி செய்யப்பட்டது. இதனைத் தொடர்ந்து, தனிப்படை அமைத்து தேடிய போலீஸார் அவரை கைது செய்தனர்.
உயர்நீதிமன்றம் தானாக தலையீடு – டிஎஸ்பி நேரடி விசாரணை.
இந்த வழக்கின் தீவிரத்தைக் கருத்தில் கொண்டு மதுரை உயர்நீதிமன்றக் கிளை தானாக முன்வந்து விசாரணையை தொடங்கியுள்ளது. வழக்கை விளாத்திகுளம் டிஎஸ்பி நேரடியாக விசாரிக்க நீதிமன்றம் உத்தரவிட்டுள்ளது.
மேலும், மாணவியின் பெற்றோரிடமிருந்து வீடியோ பதிவு மூலம் வாக்குமூலம் பெறவும், அரசு தரப்பில் விரிவான அறிக்கை தாக்கல் செய்யவும் நீதிமன்றம் உத்தரவிட்டுள்ளது. இந்த வழக்கின் அடுத்த கட்ட விசாரணை ஏப்ரல் 2, 2026 அன்று நடைபெற உள்ளது.
போலீஸார் மீது நடவடிக்கை – அலட்சியம் குற்றச்சாட்டு.
இந்த சம்பவத்தில் பெற்றோர் அளித்த புகாரை முதலில் போலீஸார் அலட்சியமாக கையாள்ந்ததாக குற்றச்சாட்டு எழுந்தது. இதையடுத்து, விளாத்திகுளம் அனைத்து மகளிர் காவல் நிலைய ஆய்வாளர் மற்றும் குளத்தூர் காவல் நிலைய உதவி ஆய்வாளர் ஆகியோர் இடைக்காலமாக பணிநீக்கம் (சஸ்பெண்ட்) செய்யப்பட்டுள்ளனர்.
உடல் ஒப்படைப்பு – குடும்பத்தினர் சம்மதம்.
குற்றவாளி கைது செய்யப்பட்டதைத் தொடர்ந்து, மாணவியின் உடலை நாளை (மார்ச் 20) காலை பெற்றுக் கொள்ள குடும்பத்தினர் சம்மதித்துள்ளதாக தகவல்கள் தெரிவிக்கின்றன. இதனால், இறுதி சடங்குகள் விரைவில் நடைபெற உள்ளன.
இந்த சம்பவம் மாநிலம் முழுவதும் பெரும் அதிர்ச்சியையும், பெண்கள் பாதுகாப்பு குறித்த கவலையையும் மீண்டும் எழுப்பியுள்ளது. விசாரணையின் அடுத்த கட்ட முன்னேற்றம் மீது பொதுமக்கள் தீவிர கவனம் செலுத்தி வருகின்றனர்.
சந்திரமோகன்
திண்டுக்கல்
