*பாகிஸ்தானில் எண்ணெய் ஒப்பந்தம் மற்றும் BLA பயங்கரவாத அமைப்பு அறிவிப்பு: அமெரிக்காவின் அடுத்த போர் பலூசிஸ்தானில் உருவாகிறதா?*
அமெரிக்கா பலூசிஸ்தான் விடுதலை இராணுவம் (BLA) மற்றும் அதன் மஜீத் படைப்பிரிவை சிறப்பாக நியமிக்கப்பட்ட உலகளாவிய பயங்கரவாதிகள் (SDGTs) பட்டியலில் சேர்த்தது. இது ஒரு நிர்வாக உத்தரவின் கீழ் மேற்கொள்ளப்பட்ட நடவடிக்கை. 2019-ஆம் ஆண்டு எடுக்கப்பட்ட இந்த முடிவு, அமெரிக்காவின் அதிகார வரம்பிற்குள் அந்தக் குழு வைத்திருக்கக்கூடிய எந்தவொரு சொத்துக்களையும் முடக்குகிறது. மேலும், அமெரிக்க குடிமக்கள் அல்லது நிறுவனங்கள் அந்தக் குழுவுடன் வர்த்தகம் செய்வதையும் தடை செய்கிறது.
பாகிஸ்தானின் பலூசிஸ்தான் மாகாணத்தில் செயல்படும் BLA, பலூச் மக்களின் சுயநிர்ணயப் போராட்டத்திற்காகச் செயல்படுவதாகக் கூறி வருகிறது. பல ஆண்டுகளாக, பாகிஸ்தான் இராணுவம், சீனப் பணியாளர்கள் மற்றும் மாகாணத்தில் சீனாவின் முதலீடுகள் தொடர்பான திட்டங்களை BLA தாக்கி வருகிறது. பாகிஸ்தானில் ஒதுக்கப்பட்ட சமூகங்களில் ஒன்றான பலூச் மக்கள், பாகிஸ்தான் அரசும் சீனாவும் தங்களின் வளங்களைச் சுரண்டிக் கொள்கின்றன என்றும், அதன் பலன்கள் உள்ளூர் மக்களுக்குக் கிடைப்பதில்லை என்றும் குற்றம் சாட்டுகின்றனர். மஜீத் படைப்பிரிவு என்பது BLA-வின் தற்கொலைத் தாக்குதல் பிரிவாகும். அண்மையில் நடந்த ரயில் கடத்தலுக்குப் பின்னால் இந்தப் பிரிவே இருந்தது.
குவாதர், கராச்சி, பலூசிஸ்தானின் பிற பகுதிகள் எனப் பல இடங்களில் BLA இராணுவ நடவடிக்கைகளைத் தொடங்கியுள்ளது. இந்தப் போராட்டங்கள், வெளியார்களின் கட்டுப்பாடுகள் மற்றும் பொருளாதாரப் புறக்கணிப்புகளுக்கு எதிரான எதிர்ப்பு என்று அந்தக் குழு கருதுகிறது.
அமெரிக்கா BLA-ஐ பயங்கரவாத அமைப்பாக அறிவித்ததற்கு பலூச் குழுக்கள் எதிர்ப்பு தெரிவித்துள்ளன. BLA ஒரு பயங்கரவாத அமைப்பு அல்ல என்றும், பலூசிஸ்தான் கடந்த 78 ஆண்டுகளாக அரசு வன்முறை, பொருளாதாரச் சுரண்டல், அணு ஆயுதச் சோதனைகளால் ஏற்பட்ட கதிர்வீச்சு நச்சுத்தன்மை ஆகியவற்றால் பாதிக்கப்பட்டு வருவதாகவும் அவர்கள் கூறுகின்றனர். அமைதியான அரசியல் குரல்களை நசுக்க, பாகிஸ்தான் அரசு IS-குராசன் போன்ற பயங்கரவாத அமைப்புகளைப் பயன்படுத்துவதாகவும் அவர்கள் குற்றம் சாட்டுகின்றனர். பலூச் மக்கள் அமெரிக்காவிடம் எப்போதும் நல்லெண்ணத்துடன் இருந்துள்ளனர். ஆப்கானிஸ்தானில் சோவியத் போர் நடந்தபோதோ அல்லது 9/11-க்கு பிந்தைய நேட்டோ நடவடிக்கைகளின்போதோ கூட, அமெரிக்கப் படைகள் அல்லது அதன் நலன்களை ஒருபோதும் குறிவைத்ததில்லை என்றும் அவர்கள் சுட்டிக்காட்டுகின்றனர்.
*பாகிஸ்தானில் எண்ணெய் எடுக்கும் திட்டங்களை டிரம்ப் அறிவிக்கிறார்.*
அமெரிக்க அதிபர் டொனால்ட் டிரம்ப், பாகிஸ்தானில் உள்ள “மிகப்பெரிய எண்ணெய் வளங்களை” கூட்டாக மேம்படுத்துவதற்காக, இஸ்லாமாபாத்துடன் புதிய வர்த்தக ஒப்பந்தம் ஒன்றை வெளியிட்டார். இந்த அறிவிப்பு, இந்தியா இறக்குமதிகளுக்கு 25% வரி மற்றும் கூடுதல் அபராதங்களை விதித்த சில மணி நேரங்களுக்குப் பிறகு வெளியானது.ஒருநாள் பாகிஸ்தான் இந்தியாவிற்கு எண்ணெய் விற்கக்கூடும் என்றும் டிரம்ப் கூறியது குறிப்பிடத்தக்கது.
உ. விக்னேஷ்வர் – சென்னை
