CPJ – COCKROACH JANATHA PARTY – காக்ரோச் ஜனதா கட்சியின் வெற்றி: நிறுவனரின் பெற்றோர் அச்சத்தில் – சமூக வலைதளங்களில் 19 மில்லியன் பின்தொடர்பவர்கள்:
ஷேக் முகைதீன், இணையாசிரியர், தமிழ்நாடு டுடே.
மும்பை: சமூக வலைதளங்களில் ‘கொக்குரோச் ஜனதா கட்சி’ (CJP) என்ற நையாண்டி அமைப்பு வெடித்துச் சிதறும் வேகத்தில் புகழ் பெற்று வரும் நிலையில், அதன் நிறுவனர் அபிஜீத் திப்கேவின் பெற்றோர் அவர் சிக்கலில் மாட்டலாம் அல்லது கைது செய்யப்படலாம் என்ற அச்சத்தில் இரவு தூக்கத்தை இழந்துள்ளனர்.
வெறும் ஒரு வாரத்துக்கு முன் பாஸ்டன் பல்கலைக்கழக மாணவரான அபிஜீத் திப்கே என்பவரால் தொடங்கப்பட்ட இந்த அமைப்பு, இன்ஸ்டாகிராமில் 19 மில்லியனுக்கும் அதிகமான பின்தொடர்பவர்களைக் கடந்துள்ளது. இவர் முன்னர் ஆம் ஆத்மி கட்சியுடன் இணைந்திருந்தார் என்பது குறிப்பிடத்தக்கது.
மகாராஷ்டிராவின் சத்திரபதி சம்பாஜி நகர் பகுதியில் வசிக்கும் இவரது பெற்றோர் பகவான் திப்கே மற்றும் அனிதா திப்கே, திங்கள்கிழமை ஒரு மராத்தி செய்தி சேனலுக்கு அளித்த பேட்டியில், தங்கள் மகன் அரசியலில் நுழைவதை விரும்பவில்லை என்று தெரிவித்தனர். அபிஜீத்தின் இந்த முயற்சியை அறிந்த பின்னர் தாங்கள் தூக்கத்தை இழந்துவிட்டதாக பெற்றோர் கூறினர்.
‘காக்ரோச்’ சின்னத்துடன் பாய்ந்த CJP:
அபிஜீத் திப்கே கூறுகையில், இந்திய தலைமை நீதிபதி சூர்ய காந்த், ஒரு வழக்கறிஞரின் மனுவை விசாரித்தபோது, ‘ஒட்டுண்ணிகள்’ மற்றும் ‘கொக்குரோச்கள்’ என விமர்சித்ததை அடுத்தே ‘கொக்குரோச் ஜனதா கட்சி’ பிறந்ததாகத் தெரிவித்தார். பின்னர் தலைமை நீதிபதி தாம் தவறாக மேற்கோள் காட்டப்பட்டதாகவும், போலிப் பட்டங்கள் மூலம் சட்டத் துறைக்குள் நுழைபவர்களைக் குறித்தே தாம் அந்த வார்த்தைகளைப் பயன்படுத்தியதாகவும் தெளிவுபடுத்தினார். இருப்பினும், பூச்சியைச் சின்னமாகக் கொண்ட CJP, சமூக வலைதளங்களில் புயலாகச் சுழன்றது.
பெற்றோரின் பதட்டமான சூழல்:
“இன்றைய அரசியலைப் பார்க்கும்போது, அவருக்கு எத்தனை லட்சம் பின்தொடர்பவர்கள் இருந்தாலும் பயம் இயற்கையானதுதான். தனக்கு அளித்த ஒரு நேர்காணலில், இந்தியா திரும்பிய பிறகு கைது செய்யப்படும் அச்சம் இருப்பதாகவே அவரே தெரிவித்துவிட்டார். இது போன்ற சம்பவங்களை நாங்கள் செய்தித்தாள்களில் படிக்கிறோம்” என்று பகவான் திப்கே கவலையுடன் தெரிவித்தார்.
தாயார் அனிதா திப்கே கூறுகையில், “அபிஜீத் அரசியலில் இருந்து விலகி, ஒரு வேலையில் கவனம் செலுத்த வேண்டும் என விரும்புகிறேன். அவர் வீட்டுக்குப் பத்திரமாகத் திரும்ப வேண்டும் என்பதே எங்கள் ஆசை. அவர் அரசியலைத் தொடருவதா வேண்டாமா என்பது அவரது முடிவுதான், ஆனால் நாங்கள் அவர் அரசியலுக்குச் செல்வதை விரும்பவில்லை. அவர் எங்கள் பேச்சைக் கேட்பாரா என்று எனக்குத் தெரியவில்லை. நான் இதற்கு ஆதரவாக இல்லை. அவரைப் பற்றி மிகவும் கவலைப்படுகிறேன்” என்று கண்ணீர் மல்கக் கூறினார்.
படிப்பு மற்றும் எதிர்காலத் திட்டங்கள்:
தாயார் மேலும் கூறுகையில், அபிஜீத் ஆரம்பத்தில் சத்திரபதி சம்பாஜி நகரில் படித்தார், பின்னர் மேற்படிப்புக்காக புனே சென்றார். பொறியியல் அவருக்குக் கடினமாக இருந்ததால், மாஸ் மீடியா பக்கம் திரும்பினார் என்றார். தந்தை பகவான் கூறுகையில், அபிஜீத்தின் சகோதரி ஏற்கனவே வெளிநாட்டில் இருந்த காரணத்தால், அவரும் பத்திரிகைத் துறையில் படிக்க வெளிநாடு சென்றதாகவும், தான் மகன் புனே அல்லது டெல்லியில் ஒரு வேலையில் சேர வேண்டும் என விரும்புவதாகவும் தெரிவித்தார்.
இந்த செய்தி PTI வெளியிட்ட தகவல்களை அடிப்படையாகக் கொண்டது.
