குடியாத்தம், ஆகஸ்ட் 22:
குடியாத்தம் நெல்லூர் பேட்டை சன்னதி வீதியில் எழுந்தருளியிருக்கும் ஸ்ரீதேவி மாசுபட அம்மன் ஆலயத்தில், வருடாந்திர 6 வெள்ளி ஊஞ்சல் உற்சவம் இன்று காலை பக்தி நிறைந்த முறையில் நடைபெற்றது.
காலை 9 மணியளவில், காமாட்சியம்மன் பேட்டை திரௌபதி அம்மன் ஆலயத்தில் இருந்து 1008 பால்குடங்களை தாங்கிய பக்தர்கள், பம்பை, பூந்தேர், மேளதாளக் கருவிகளுடன் உற்சவ ஊர்வலமாக புறப்பட்டு, நேதாஜி சவுக்கு வழியாக ஸ்ரீதேவி மாசுபட அம்மன் ஆலயத்தை வந்தடைந்தனர்.
அங்கு அம்மனுக்கு பால் அபிஷேகம், சிறப்பு அலங்காரம், வேத மந்திரங்கள் ஒலிக்கச் சிறப்பு பூஜைகள் நடைபெற்றன. நிகழ்ச்சியில் பரதநாட்டிய கலை நிகழ்ச்சி ஏற்பாடு செய்யப்பட்டு பக்தர்கள் ரசித்து மகிழ்ந்தனர்.
மாலை 5 மணிக்கு மஞ்சள் காப்பு அலங்காரம் நடைபெற்றது. தொடர்ந்து மாலை 6 மணிக்கு பூ கரகம், பூப்பல்லக்கு, பூந்தேர் ஊர்வலம் வெகு விமரிசையாக நடந்தது. அத்துடன் தீச்சட்டி, தீமிதி விழா, வானவேடிக்கைகள் நடைபெற்றன.
கமிட்டினரின் பங்களிப்பு
இந்த உற்சவங்களை விழா கமிட்டினர் ஆர். தயாளன், ஏ.ஆர். மாதவன், எம். கருணாகரன், எஸ். குமார், எஸ். ஜெயரலிங்கம், எஸ். நாகலிங்கம், ஏ. தண்டபாணி, கே.எம். மோகன், ஈஸ்வரன், வெங்கடேசன், மணிவண்ணன் ஆகியோர் ஒருங்கிணைத்து வெற்றிகரமாக நடத்தியிருந்தனர்.
குடியாத்தம் செய்தியாளர்: கே.வி. ராஜேந்திரன்
