திண்டுக்கல் மாவட்டத்தில், தாடிக்கொம்பு பகுதியில் அமைந்துள்ள அருள்மிகு சௌந்தரராஜ பெருமாள் திருக்கோவில், தமிழ்நாட்டின் சிற்பக் கலை மற்றும் கட்டிடக்கலை நயத்தின் ஒப்பற்ற சின்னமாக திகழ்கிறது.
🔹 பின்புலம்
இத்திருக்கோவில் 16ஆம் நூற்றாண்டில் மதுரை நாயக்கர் ஆட்சிக் காலத்தில் கட்டப்பட்டது. சோழர், பாண்டியர், நாயக்கர் ஆகிய மன்னர்களின் கட்டிடக்கலை பாணிகளை இணைத்து வடிவமைக்கப்பட்டுள்ளதால் தனித்துவம் பெறுகிறது. ஒரே கல்லால் செதுக்கப்பட்ட யாழிசைத் தூண்கள், கலை நயம் மிக்க கோபுரங்கள், விக்ரஹங்கள், சுவரோவியங்கள் என ஒவ்வொரு பகுதியும் சிற்பக் கலைக்கு உயிரூட்டும் வகையில் அமைந்துள்ளது.
🔹 முக்கியத்துவம்
தமிழகத்தில் தஞ்சை பெரிய கோயில், கங்கைகொண்ட சோழபுரம், ஸ்ரீரங்கம் ரங்கநாதசுவாமி கோவில், மதுரை மீனாட்சி அம்மன் திருக்கோவில் ஆகியவை ஏற்கனவே உலகப்புகழ் பெற்ற சுற்றுலா தலங்களாக திகழ்கின்றன. அதே வரிசையில் தாடிக்கொம்பு சௌந்தரராஜ பெருமாள் திருக்கோவிலையும் சேர்க்க தமிழக அரசு முடிவு செய்துள்ளது.
சுற்றுலா தலமாக அறிவிக்கப்பட்டதும், மாநில சுற்றுலா துறையின் பராமரிப்பு, சீரமைப்பு, விளம்பர நடவடிக்கைகள் மேற்கொள்ளப்படும்.
உள்நாட்டு மற்றும் வெளிநாட்டு சுற்றுலாப் பயணிகள் திண்டுக்கலை நோக்கி வருவதால், உள்ளூர் பொருளாதார வளர்ச்சிக்கு பெரிதும் துணை நிற்கும்.
திண்டுக்கலின் வரலாற்று, மத, கலாச்சார முக்கியத்துவத்தை உலகிற்கு எடுத்துரைக்கும் வாய்ப்பாகும்.
🔹 எதிர்பார்ப்பு
“சௌந்தரராஜ பெருமாள் கோவில் சுற்றுலா தலமாக உயர்ந்தால், திண்டுக்கல் மாநகரின் அடையாளங்களில் ஒன்றாக இது விளங்கும். ஹோட்டல்கள், வணிகம், கைவினைப் பொருட்கள், வழிகாட்டி வேலை வாய்ப்புகள் போன்ற பல துறைகளில் வேலை வாய்ப்புகள் உருவாகும்” என திருக்கோவில் அறங்காவலர் குழுத் தலைவர் விக்னேஷ் பாலாஜி தெரிவித்துள்ளார்.
அரசின் அறிவிப்பு வெளியானதும், சுற்றுலா துறையுடன் இணைந்து கலாச்சார நிகழ்ச்சிகள், வழிகாட்டி பயிற்சிகள், தொல்பொருள் ஆய்வுகள் போன்றவை நடைபெற உள்ளன என்று எதிர்பார்க்கப்படுகிறது.
இந்த முடிவால் திண்டுக்கல் மாவட்டம், மதுரை – தஞ்சை – திருச்சி சுற்றுலா வளையத்தில் முக்கிய இடத்தைப் பெறும் என்ற நம்பிக்கையும் மக்களிடையே உருவாகியுள்ளது.
செய்திகள்: ராமர் – திருச்சி
